Marie-Chrétienne

LÉGENDE AMIÉNOISE

Lecture faite à la Séance publique de l'Académie du 26 Janvier 1900.

INTRODUCTION

«Tout par edlo, da l' citadelle,

« A l'einne d' chés march's de ch' fossé
<< Eincaissé,

«Est ch' treu d'où que s' muche l' sorcielle,
«L' sorciell' qu'eingloutit chés einfants

((

« Tout vivants.

N'approch' point par lo, jonn' fillette;
«Fuis ch' l'eindroit meudit, jonn' garchon :

« Mari'-Chrétienne est lo qu'all' guette!

<< Mari'-Chrétienn' guette ch' mouqu'ron! »

((

Ch'est einne histoire èqu' du teimps d' min jonne âge,
No mère, à l' veille, avant d' nous eindord'ler,
Contoit souvent por nous foir' rester sage
Afan qu' no père, à l'ais', puch' travailler.

Mari'-Chrétienn'! sitôt qu'alle ouvroit s' bouque
Por ein d'visier, laissant ein r'pos, sin rouet,
Os éroit pu einteind' brouir einn' mouque

Da l' moisonnée où feinmoit ch' tchot crachet.

Mes frèr's, mes sœurs, mi-mêm, preins d'einn' peur bleue, Vite, einfonçoinm's no têt' da ch' creux d' sin gron,

Et même ch' cot n'osoit pus r'muer s' queue

Afan de n' point troubler ch' sileinche d' plomb.
Du diab' si l'ein d' nous eut's airoit I'vé s' tête :
<< Mari'-Chrétienne a s' pronm'noit da ch' quartier!
Mari'-Chrétienn' nous guignoit pa l' fernête!
Mari-Chrétienn' descheindoit pa ch' grinier,
Ses yux milants, foisant claquer s' macoire
D'où dépassoient deux deints longs conm' des crocs,
Dessaquant s' langue et, d'einn' seule avaloire,
Prête à mainger tous chés brayeux d' marmots. >>
Pis, duchett'meint, nous preindant par el taille
L' mèr' dégrafoit sarraux et tabliers,

Et pou s'n aller dodo, bientôt l' marmaille,
Bannièr's au veint, grimpoit chés escaliers.
Alors chacun sans desserrer ses leuves

Qu' por boisier nos pareints, tranquilles d' nous,
Quittoinmes l' terr' por èch' poys d' chés reuves,
Où qu' pou chés mioch's tout est bieu, tout est doux.

Ch'est einne histoir' qu'à min tour éj raconte

A mes einfants, m' rameinteuvant mes viux.

Mais ch' teimps n'est pus ouèch' qu'o s'anmus' d'ein conte: Mari'-Chrétienne a n' sait pus clor' chés yux.

PREMIER CHANT

L' pocession d' chés Sants-German coucous

«Sant-German coucous

«Ch'est l' fête d' chés fous.
«Edman ch'est no fête !

« Ch'est l' fête d' Sant-Leu! >>

A pangn' si l' Nuit o r'tiré s' calipète,
Si ch' grand boin Diu o mis sin ciel au bleu,
Si chés cats-houins ont reinfiqué leu tête

Da chés av'nell's de ch' viux cloquer d' Sant-Leu,
Que d' chés moisons rédé's su chés rivières,
Da tout's chés ru's conm' da tous chés culs-d'-sac,
O voit sortir einn' baind' de ptchots misères
Ayant l' panch' creus', mais d' gaîté plein leu sac.
Ch'est d'man no fêt'! gno rien d'eutr' qui les teinte.
Ch'est d'man no fêt'! chacun s'est einseuvé
Pou l' pocession, quittant s' mèr' qu'a s' larmeinte
Parc' que ch' mouqu'ron par ell' n'o 'té gavé.
«S'il alloit teherr' malad'! Diu! qué lapide! >>
Bast! n' brayez point; vo ptchot n'est mi' perdu.
Ch'est d'man no fêt'! si pou l'heur' s' panche est vide,
I boiro doube edman, quitt' d'êtr' peindu.

Mais pou l' monmeint, bayez là-bos, l' marmaille

Qui s'écannille et piaill' conme d's oisieux.

Ah! disez donc, pou des einfants d' pauvraille,
Disez, qu'i sont bien joufflus, fan glorieux.
Pis ravisez conme i défil'nt d'attaque,

Crân'meint conduits pa ch' clairon pis ch' tambour.
Ch'est d'man no fête ! et l's-e vlo da l' Queu' d' Vaque,
I vont torner par el Fontangn' d'Anmour.

Ch'est d'man no fêt'! bayez, bayez chés mioches,
Tertous aussi rétus qu' des ptchots boins Diux,
F'sant résonner su ch' pavé leus galoches,
Armés d' soleils; bayez chés fill's, chés fiux
S'égaviotter ein chuchant leus candeilles :

Ch'est d'man no fêt'! Sants-Leu, dégrouillez-vous,
Foisez vos flans, d' chės lapans s'couez ch's oreilles.
Chés Sants-German ch'est d's ein-r'tard pis des fous.

Vlo l' pocession, tout là-bos, qu'all' rapasse...
Qu' chés galibiers, min Diu! sont berdouillés.
Leus longs cavieux, touillés conme einn' crignasse,
Les foitt'nt sanner à des moutons mouillés.
Bai'! qu' cho put foire èqu' dépass' leu loquette?
Cho n'est-i point ch' drapieu d' chés innocheints?
Acoutez-l's-e canter: Ch'est d'man no fête !

Ch'est l' fêt' Sant-Leu! Ch'est l' fête d' chés brav's geins!
Ch'est d'man no fête! oui, da toute l' Couchie,

Chés panch's i s'ront bourré's conm' des cannons.

Tous vont s'gaver, mier l' gaîté à l' louchie.

Ch'est d'man no fête! après.,. os avis'rons.

Ein atteindant, qu'o prépare l' castrole.
Cho n'est mi' l' jour de d'visier corbillard.
Feut savoir preinde èch' plaisi qui vous frôle.
Ch' Soleil ne s' much' mi' toujours pou ch' lazard.
Riez, cantez, foit's aller vo cliquette;

Usez vo langue à berd'ler, nom d'ein bleu !

Et qu'aujord'hui tout ein chacun répète

Aveuc chés cloqu's de ch'viux cloquer d' Sant-Leu: