laissez de temps n'estoit non plus vostre que celuy qui s'est passé avant vostre naissance, et ne vous touche non plus.

Respice enim quam nil ad nos ante acta vetustas
Temporis æterni fuerit.

Où que vostre vie finisse, elle y est toute. Pensiez vous jamais n'arriver là où vous alliez sans cesse? Et si la compagnie vous peut soulager, le monde ne va-il pas mesme train que vous allez ?

Omnia te, vita perfuncta, sequentur.

Tout ne branle-il pas vostre branle? Y a-il rien qui ne vieillisse quant et vous? Mille hommes, mille animaux et mille autres creatures meurent en cette mesme heure que vous mourez.

Nam nox nulla diem, neque noctem aurora sequuta est,
Quæ non audierit mistos vagitibus ægris

Ploratus, mortis comites et funeris atri.

Voilà les bons advertissemens de nostre mere nature. Or j'ay pensé souvent d'où venoit cela qu'aux guerres, le visage de la mort, soit que nous la voyons en nous ou en autruy, nous semble sans comparaison moins effroyable qu'en nos maisons: autrement ce seroit un' armée de medecins et de pleurars; et, elle estant tousjours une, qu'il y ait toutes-fois beaucoup plus d'asseurance parmy les gens de village et de basse condition qu'és autres. Je croy à la verité que ce sont

ces mines et appareils effroyables dequoy nous l'entournons qui nous font plus de peur qu'elle : une toute nouvelle forme de vivre, les cris des meres, des femmes et des enfans, la visitation de personnes estonnées et transies, l'assistance d'un nombre de valets pasles et éplorez, une chambre sans jour, des cierges allumez, nostre chevet assiegé de medecins et de prescheurs : somme, tout horreur et tout effroy autour de nous. Nous voylà des-ja ensevelis et enterrez. Les enfans ont peur de leurs amis mesmes quand ils les voyent masquez, aussi avons nous. Il faut oster le masque aussi bien des choses que des personnes. Osté qu'il sera, nous ne trouverons au dessoubs que cette mesme mort qu'un valet ou simple chambriere passerent dernierement sans peur. Heureuse la mort, et heureuse trois fois, qui oste le loisir aux apprests de tel equipage!

CHAPITRE XXI.

De la force de l'imagination.

ORTIS imaginatio generat casum,

disent les clercs. Je suis de ceux qui sentent

trés-grand effort de l'imagination; chacun en est feru, mais aucuns en sont transformez. Gallus Vibius banda si bien son ame et la tendy à comprendre et imaginer l'essence et les mouvemens de la folie, qu'il

emporta son jugement mesme hors de son siege, si qu'onques puis il ne l'y peut remettre : et se pouvoit vanter d'estre devenu fol par discours. Il y en a qui de frayeur anticipent la main du bourreau; et celuy qu'on debandoit pour luy lire sa grace se trouva roide mort sur l'eschafaut, du seul coup de son imagination. Nous tressuons, nous tremblons, nous pallissons et rougissons aux secousses de nos imaginations, et, renversez dans la plume, sentons nostre corps agité à leur bransle, quelques-fois jusques à la mort. Et la jeunesse bouillante s'eschauffe si avant en son harnois tout' endormie, qu'elle assouvit en songe ses amoureux desirs.

Ut, quasi transactis sæpe omnibus rebus, profundant
Fluminis ingentes fluctus, vestemque cruentent.

Et encore qu'il ne soit pas nouveau de voir croistre, la nuict, des cornes à tel qui ne les avoit pas en se couchant, toutesfois l'evenement de Cyppus, roy d'Italie, est memorable, lequel, pour avoir assisté le jour avec grande affection au combat des taureaux et avoir eu en songe toute la nuict des cornes en la teste, les produisit en son front par la force de l'imagination. La passion donna au fils de Croesus la voix que nature luy avoit refusée. Et Antigonus print la fievre de la beauté de Stratonicé trop vivement empreinte en son ame. Pline dict avoir veu Lucius Cossitius de femme changé en homme le jour de ses nopces. Pontanus et d'autres racontent pareilles metamorphoses advenues en Italie ces siecles passez, et par vehement desir de luy et de sa

mere.

Vota puer solvit, quæ fœmina voverat, Iphis.

Passant à Victry le Françoys, je peuz voir un homme que l'evesque de Soissons avoit nommé Germain en confirmation, lequel tous les habitans de là ont cogneu et veu fille jusques à l'aage de vingt deux ans, nommée Marie. Il est à cett' heure fort barbu et vieil, et ne s'est point marié. Faisant, dict-il, quelque effort en sautant, ses membres virils se produisirent; et est encore en usage entre les filles de là une chanson par laquelle elles s'entradvertissent de ne faire point de grandes enjambées, de peur de devenir garçons comme Marie Germain. Ce n'est pas tant de merveilles si cette sorte d'accident se rencontre frequent : car, si l'imagination peut en telles choses, elle est si continuellement et si vigoureusement exercée en ce subject que, pour n'avoir si souvent à rechoir en mesme pensée et aspreté de desir, elle a meilleur compte d'attacher et incorporer, une fois pour toutes, cette virile partie aux filles.

Les uns attribuent à la force de l'imagination les cicatrices du roy Dagobert et de sainct François. On dict que les corps s'en-enlevent telle fois de leur place. Et Celsus recite d'un prebstre, qui ravissoit son ame en telle extase que le corps en demeuroit longue espace sans respiration et sans sentiment.

Il est vraysemblable que le principal credit des miracles, des visions, des enchantemens et de tels effects extraordinaires vienne de la puissance de l'imagination, agissant principalement contre les ames du vulgaire, où il y a moins de resistance. On leur a si fort saisi la creance qu'ils pensent voir ce qu'ils ne voyent pas.

Je suis encore de cette opinion que ces plaisantes

liaisons des mariages, dequoy le monde se voit si plein qu'il ne se parle d'autre chose, ce sont des impressions de l'apprehension et de la crainte. Car je sçay par experience que tel, de qui je puis respondre comme de moy mesme, en qui il ne pouvoit eschoir soupçon de foiblesse et aussi peu d'enchantement, ayant ouy faire un conte à un sien compagnon d'une defaillance extraordinaire en quoy il estoit tombé sur le point qu'il en avoit le moins de besoin, se trouvant en pareille occasion, l'horreur de ce conte luy vint si rudement frapper l'imagination qu'il en encourut une fortune pareille. Cela n'est à craindre qu'aux entreprinses où nostre ame se trouve outre mesure tandue de desir et de respect, et notamment où les commoditez se rencontrent improveues et pressantes. A qui a assez de loisir pour se ravoir et remettre de ce trouble, mon conseil est qu'il divertisse ailleurs son pensement, s'il peut, car il est difficile, et qu'il se desrobe de cette ardeur et contention de son imagination. J'en sçay à qui il a servy d'y apporter le corps mesme, amolly et affoibly d'ailleurs. Et à celuy qui sera en alarme des liaisons, qu'on luy persuade hors de là qu'on luy fournira des contre-enchantemens d'un effect merveilleux et certain. Mais il faut aussi que celles à qui legitimement on le peut demander ostent ces façons ceremonieuses et affectées de rigueur et de refus, et qu'elles se contraignent un peu pour s'accommoder à la necessité de ce siecle malheureux : car l'ame de l'assaillant, troublée de plusieurs diverses allarmes, elle se perd aisement; et ce n'est pas tout, car celuy à qui l'imagination a faict une fois souffrir cette honte (et