homme qui souhaiteroit de bien grande affection que les moyens que les siens luy ont mis en main se peussent employer, tant qu'il plaira à la fortune qu'il en joüisse, à mettre à l'abry de la necessité les personnages rares et remarquables en quelque sorte de valeur, que le mal'heur combat quelquefois jusques à l'extremité; et qui les mettroit pour le moins en tel estat qu'il ne tiendroit qu'à faute de bon discours s'ils n'estoyent contens.

CHAPITRE XXXVI.

De l'usage de se vestir.

u que je vueille donner, il me faut forcer quelque barriere de la coustume, tant ell' a soigneusement bridé toutes nos avenues. Je devisoy, en cette saison frileuse, si la façon d'aller tout nud de ces nations dernierement trouvées est une façon forcée par la chaude temperature de l'air, comme nous disons des Indiens et des Mores, ou si c'est l'originele des hommes. Les gens d'entendement, d'autant que tout ce qui est soubs le ciel, comme dit la saincte parole, est subject à mesmes loix, ont accoustumé en pareilles considerations à celles icy, où il faut distinguer les loix naturelles des controuvées, de recourir à la ge

neralle police du monde, où il n'y peut avoir rien de contrefaict. Or, tout estant exactement fourny ailleurs de filet et d'éguille, pour maintenir son estre, il est à la verité mécreable que nous soyons seuls produits en estat deffectueux et indigent, et en estat qui ne se puisse maintenir sans secours estrangier. Ainsi je tiens que, comme les plantes, arbres, animaux et tout ce qui vit se treuve naturellement equippé de suffisante couverture pour se deffendre de l'injure du temps,

Proptereaque fere res omnes aut corio sunt,

Aut seta, aut conchis, aut callo, aut cortice tecta,

aussi estions nous mais, comme ceux qui esteignent par artificielle lumiere celle du jour, nous avons esteint et estouffé nos propres moyens par les moyens empruntez et estrangiers. Et est aisé à voir que c'est la coustume qui nous faict impossible ce qui ne l'est pas : car de ces nations qui n'ont aucune connoissance de vestemens, il s'en trouve d'assises environ soubs mesme ciel que le nostre; et puis la plus delicate partie de nous est celle qui se tient tousjours descouverte. Si nous fussions nez avec condition de cotillons et de greguesques, il ne faut faire doubte que nature n'eust armé d'une peau plus espoisse ce qu'elle eust abandonné à la baterie des saisons, comme elle a garny le bout des doigts et plante des pieds. Je ne sçay qui demandoit à un de nos gueux, qu'il voyoit en chemise en plain hyver, aussi scarrebillat que tel qui se tient ammitoné dans les martes jusques aux oreilles, comme il pouvoit avoir patience. « Et vous, monsieur, respondit-il, vous avez bien

la face descouverte or moy je suis tout face. » Les Italiens content du fol du duc de Florence, ce me semble, que son maistre s'enquerant comment ainsi mal vestu, il pouvoit porter le froid, à quoy il estoit bien empesché luy-mesme: «Suivez, dict-il, ma recepte de charger sur vous tous vos accoustremens, comme je fay les miens, vous n'en souffrirez non plus que moy. » Le roy Massinissa jusques à l'extreme vieillesse ne peut estre induit à aller la teste couverte par froid, orage et pluye qu'il fit; et le roy Agesilaus observa jusques à sa decrepitude de porter pareille vesture en hyver qu'en esté. Cæsar, dict Suetone, marchoit tousjours devant sa troupe, et le plus souvent à pied, la teste descouverte, soit qu'il fit soleil ou qu'il pleût; et autant en dict on de Hannibal,

Tum vertice nudo

Excipere insanos imbres calique ruinam.

leur roy,

Celuy que les Polonnois ont choisi pour aprés le nostre, qui est à la verité un des plus grands princes de nostre siecle, ne porte jamais gans, ny ne change, pour hyver et temps qu'il face, le mesme bonnet qu'il porte au couvert. Comme je ne puis souffrir d'aller desboutonné et destaché, les laboureurs de mon voisinage se sentiroient entravez de l'estre. Varro dict que, quand on ordonna que nous tinsions la teste descouverte en presence des dieux ou du magistrat, on le fit plus pour nostre santé, et nous fermir contre les injures du temps, que pour compte de la reverence. Et puis que nous sommes sur le froid, et François accoustumez à nous biguarrer (non pas moy, car je ne m'ha

bille guiere que de noir ou de blanc, à l'imitation de mon pere), adjoustons d'une autre piece, que le capitaine Martin du Bellay dict, au voyage de Luxembourg, avoir veu les gelées si aspres que le vin de la munition se coupoit à coups de hache et de coignée, se debitoit aux soldats par poix, et qu'ils l'emportoient dans des paniers. Et Ovide à deux doigts prez:

Nudaque consistunt, formam servantia testa,

Vina, nec hausta meri, sed data frusta bibunt.

Les gelées sont si aspres en l'emboucheure des Palus Mæotides, qu'en la mesme place où le lieutenant de Mithridates avoit livré bataille aux ennemis à pied sec et les y avoit desfaicts, l'esté venu, il y gaigna contre eux encore une bataille navale. Sur le subject de vestir, le roy de la Mexique changeoit quatre fois par jour d'accoustremens, jamais ne les reiteroit, employant sa desferre à ses continuelles liberalitez et recompenses; comme aussi jamais ny pot, ny plat, ny utensile de sa cuisine et de sa table, ne luy estoient servis à deux fois.

CHAPITRE XXXVII.

Du Jeune Caton.

E n'ay point cette erreur commune de juger d'autruy selon moy, et de rapporter la con

dition des autres hommes à la mienne. Je croy aysément d'autruy beaucoup de choses où mes forces ne peuvent attaindre. La foiblesse que je sens en moy n'altere aucunement les opinions que je dois avoir de la vertu et valeur de ceux qui le meritent. Rampant au limon de la terre, je ne laisse pas de remerquer jusques dans les nuës la hauteur d'aucunes ames heroïques. C'est beaucoup pour moy d'avoir le jugement reglé, si les effects ne le peuvent estre, et maintenir au moins cette maistresse partie exempte de la corruption et débauche: c'est quelque chose d'avoir la volonté bonne, quand les jambes me faillent. Ce siecle auquel nous vivons, au moins pour nostre climat, est si plombé, que le goust mesme de la vertu en est à dire; et semble que ce ne soit autre chose qu'un jargon de colliege. Virtutem verba putant, ut lucum ligna; il ne se recognoit plus d'action purement vertueuse celles qui en portent le visage, elles n'en ont pas pourtant l'essence, car le profit, la gloire, la crainte, l'accoutumance et autres telles causes estrangeres, nous acheminent à les produire. La justice, la vaillance, la debonnaireté que nous exerçons lors, elles peuvent estre