souffrir toutes les sortes de tourmens qui se pourront inventer contre un captif. » L'autre, d'une mine non seulement asseurée, mais rogue et altiere, se tint sans mot dire à ces menaces. Lors Alexandre, voyant l'obstination à se taire : « A-il flechy un genouil? luy est-il eschappé quelque voix suppliante? Vrayment je vainqueray ce silence, et si je n'en puis arracher parole, j'en arracheray au moins du gemissement. » Et, tournant sa cholere en rage, commanda qu'on lui perçast les talons et qu'on y traversast une corde; et le fit ainsi trainer tout vif, deschirer et desmembrer au cul d'une charrete. Seroit-ce que la force de courage luy fut si naturelle et commune que, pour ne l'admirer point, il l'estimast et respectast moins?

CHAPITRE II.

De la Tristesse.

E suis des plus exempts de ceste passion; mais le conte dit que Psammenitus, roy d'Egypte, ayant esté deffait et pris par Cambises, roy de Perse, voyant passer devant luy sa fille prisonniere, habillée en servante, qu'on envoyoit puiser de l'eau, tous ses amis pleurans et lamentans autour de luy, se tint coy sans mot dire, les yeux fichez en terre; et voyant encore tantost qu'on menoit son fils à la mort, se maintint en ceste mesme contenance; mais

qu'ayant apperçeu un de ses domestiques conduit entre les captifs, il se mit à battre sa teste et mener un dueil extreme.

Cecy se pourroit apparier à ce qu'on vid dernierement d'un prince des nostres qui, ayant ouy à Trante, où il estoit, nouvelles de la mort de son frere aisné, mais un frere en qui consistoit l'appuy et l'honneur de toute sa maison, et bien tost aprés d'un puisné, sa seconde esperance, et ayant soustenu ces deux charges d'une constance exemplaire; comme quelques jours aprés un de ses gens vint à mourir, il se laissa emporter à ce dernier accident, et quittant sa resolution s'abandonna au dueil et aux regrets, en maniere qu'aucuns en prindrent argument qu'il n'avoit esté touché au vif que de ceste derniere secousse; mais à la verité ce fut qu'estant d'ailleurs plein et comblé de tristesse, la moindre sur-charge brisa les barrieres de la patience. Il s'en pourroit (di-je) autant juger de nostre histoire, n'estoit qu'elle adjouste que Cambises, s'enquerant à Psammenitus pourquoy, ne s'estant esmeu au malheur de son fils et de sa fille, il portoit si impatiemment celuy d'un de ses amis : « C'est, respondit-il, que ce seul dernier desplaisir se peut signifier par larmes, les deux premiers surpassans de bien loin tout moyen de se pouvoir exprimer. »

A l'aventure reviendroit à ce propos l'invention de cet ancien peintre, lequel ayant à representer au sacrifice de Iphigenia le dueil des assistans, selon les degrez de l'interest que chacun apportoit à la mort de ceste belle fille innocente, ayant espuisé les derniers efforts de son art, quand ce vint au pere de la fille, il

le peignit le visage couvert, comme si nulle contenance ne pouvoit representer ce degré de dueil. Voylà pourquoy les poëtes feignent cette miserable mere Niobé, ayant perdu premierement sept fils, et puis de suite autant de filles, sur-chargée de pertes, avoir esté en fin transmuée en rochier:

pour exprimer cette morne, muette et sourde stupidité qui nous transit lors que les accidens nous accablent surpassans nostre portée. De vray, l'effort d'un desplaisir, pour estre extreme, doit estonner toute l'ame et luy empescher la liberté de ses actions, comme il nous advient, à la chaude alarme d'une bien mauvaise nouvelle, de nous sentir saisis, transis et comme perclus de tous mouvemens, de façon que l'ame, se relaschant aprés aux larmes et aux plaintes, semble se desprendre, se demesler, et se mettre plus au large et à son aise :

Et via vix tandem voci laxata dolore est.

Chi puo dir com' egli arde è in picciol fuoco,

disent les amoureux qui veulent representer une passion insupportable.

... misero quod omnes

Eripit sensus mihi. Nam simul te,
Lesbia, aspexi, nihil est super mi
Quod loquar amens.

Lingua sed torpet, tenuis sub artus
Flamma dimanat, sonitu suopte

Tinniunt aures, gemina teguntur
Lumina nocte.

De vray, ce n'est pas en la vive et plus cuysante chaleur de l'accés, que nous sommes propres à desployer nos plaintes et nos persuasions : l'ame est lors aggravée de profondes pensées, et le corps abbatu et languissant d'amour; et de là s'engendre par fois la defaillance fortuite qui surprent les amoureux si hors de saison, et ceste glace qui les saisit, par la force d'une ardeur extreme, au giron mesme de la jouyssance, accident qui ne m'est pas incogneu. Toutes passions qui se laissent gouster et digerer ne sont que mediocres :

Curæ leves loquuntur, ingentes stupent.

La surprise d'un plaisir inesperé nous estonne de

mesme.

Ut me conspexit venientem, et Troïa circum
Arma amens vidit magnis exterrita monstris,
Diriguit visu in medio, calor ossa reliquit,

Labitur, et longo vix tandem tempore fatur.

Outre la femme romaine qui mourut surprise d'aise de voir son fils revenu de la route de Cannes, Sophocles et Denis le Tyran qui trespasserent d'aise, et Talua qui mourut en Corsegue lisant les nouvelles des honneurs que le Senat de Rome luy avoit decernez, nous tenons en nostre siecle que le pape Leon dixiesme ayant esté adverty de la prinse de Milan, qu'il avoit extremement souhaitée, entra en tel excez de joye que la fievre l'en print et en mourut. Et pour un plus notable tesmoignage de l'imbecilité naturelle, il a esté remarqué par les anciens que Diodorus le Dialecticien

mourut sur le champ, espris d'une extreme passion de honte pour, en son eschole et en public, ne se pouvoir desvelopper d'un argument qu'on luy avoit faict. Je suis peu en prise de ces violentes passions; j'ay l'apprehension naturellement dure, et l'encrouste et espessis tous les jours par discours.

CHAPITRE III.

Nos affections s'emportent au delà de nous.

EUX qui accusent les hommes d'aller tousjours beant aprés les choses futures, et nous aprennent à nous saisir des biens presens et nous rassoir en ceux-là comme n'ayant aucune prise sur ce qui est à venir, voire assez moins que nous n'avons sur ce qui est passé, touchent la plus commune des humaines erreurs, s'ils osent appeller erreur chose à quoy nature mesme nous achemine pour le service de la continuation de son ouvrage.

Nous ne sommes jamais chez nous, nous sommes tousjours au delà. La crainte, le desir, l'esperance, nous eslancent vers l'advenir, et nous desrobent le sentiment et la consideration de ce qui est pour nous amuser à ce qui sera, voire quand nous ne serons plus.

Entre les loix qui regardent les trespassez, celle icy me semble autant solide qui oblige les actions des