lomb apporta en larche de Noë, la branche doliue, qui est signe de paix, entre Dieu et les hommes: mais le Corbeau demoura obstiné sur vne charongne puante. Sophy cherche et tache par tous moyens daccorder les Princes Chrestiens, pour destruire les infideles et le grand Euesque de nostre loy, ny veult entendre. Dieu vueille pouruoir à tout. FIN. SENSUIT LOCCASION ET MATIERE DU RECENT ET NOUUEAU SAVFCONDVIT donné de plein vouloir par le Souldan, aux subietz du Roy treschrestien, tant pour aller en pelerinage au saint Sepulcre, comme trafiquer marchandement en ses terres et seigneuries Doultremer. En ceste petite derniere particule, qui conclura toute louure presente, sera monstree la tierce difference: Cestasauoir du Souldan au Pape moderne, quant à laffection quil ha au Roy treschrestien, Loys douzieme heureusement regnant, et à tout le bien publique de Chrestienté. Pour laquelle chose faire, il faut vn peu rememorer la victoire de messieurs les Cheualiers de Rhodes laquelle ilz obtindrent lannee passee contre les gens dudit Souldan et du Turc car de ce, procede la fondation dudit Saufconduit, qui est presques chose miraculeuse, et redonde à grand honneur et gloire dudit seigneur Roy treschrestien. Lan passé, qui fut mille cinq cens et dix, au moys d'Aoust, la tresnoble et tresualeureuse Cheualerie de saint Iean de Rhodes, laquelle est le boluert, et fort auantmur de Chrestienté deuers les parties d'Orient, comme elle ha accoustumé de faire tous les ans, mit sus vne bonne armee sur mer, pour resister aux nouuelles emprinses du Turc et du Souldan. Lesquelz combien que de tous temps ilz soient ennemis lun de lautre à cause de leurs seigneuries frontieres et limitrophes, non pourtant, pour crainte de lalliance et confederation des Princes Chrestiens, faite et iuree à la paix de Cambray, laquelle estoit directement contre eux (si Dieu eust voulu que le chef de la ligue eust charié droit) iceux Princes Orientaux, Turc et Souldan, sestoient aussi ralliez et contrebendez entre eux et auoient conspiré de destruire premierement Rhodes, comme celle qui trop les grieue, et assubiettit. Dont pour mettre leur intelligence à effect, le Turc Pazahith Othuman à present regnant, auoit enuoyé au Souldan lun de ses filz nommé Courconcy, (1) auec toute fourniture dartillerie, de harnois de guerre, de ferraille, de nauires, dancres, et autres choses pertinentes iusques à suffisance, pour armer cent galeres : et le Souldan de sa part, faisoit grosse diligence de mettre la chose en train. Mais pource que le païs d'Egypte est diseteux et sterile de boys et de grands forestz, et que ledit Souldan ha vn autre quartier de païs en Surie, là ou il croit abondance desdites. matieres de fustaille et mesrien, souz ombre dune paix et appointement qu'il disoit auoir auec monsieur le grand maistre de Rhodes, iceluy Souldan feit equipper vingtquatre ou vingtcinq voiles, que Fustes que Barches et Gallions, tresbien armez et empauaisez à la mode de pardeça, et tresbien fournis de traict à pouldre; et sur icelles enuiron deux mille combatans que Turcz que Mameluz. Desquelz estoient chefz et conducteurs ledit Courconcy, filz du Turc, et vn autre capitaine pour le Souldan. Si chargerent leurs (1) Corcud, dépossédé par son frère Sélim Ier. dites Fustes, de boys pour faire nauires, de lin pour faire voiles et cables, et darcz Turquois et de flesches. Or sachans lesdits seigneurs de Rhodes, que cecy se dressoit au desavantage de leur religion, et de toute la Chrestienté, ilz se delibererent dy obuier par bon moyen. Et de fait, quand ilz virent leur opportunité, enuahirent et enuestirent courageusement lesdits nauires du Souldan, estans chargees au port de Iaffe, tellement que apres grosse et aspre bataille, qui fut le vingtetunieme iour d'Aoust, mille cinq cens et dix, lesdits seigneurs de Rhodes demourerent maistres et vainqueurs. Le capitaine des gens du Souldan y fut tué. Le filz du Turc fut contraint dabandonner ses nauires, et se ietter en terre auec la reste de ses gens si se sauua à la fuite. Parquoy grand honneur en aduint à messieurs de Rhodes: apres laquelle victoire, ilz sen retournerent triomphamment à Rhodes, et amenerent les nauires chargees desdites despouilles, des ennemis de nostre foy. De ceste perte ha esté le Souldan si tresdolent, que apres le conseil tenu auec ses Satrapes et Mameluz, il feit premierement prendre, enferrer, enchainer et emprisonner, tous les marchands Chrestiens estans en Egypte et Surie, iusques au nombre de mille personnes, et tous les religieux du saint sepulcre de Hierusalem, et des autres lieux sacrez de la terre sainte. Et iusques à ores les detient en estroite garde. De son premier motif, et de chaude chole, il ordonna de faire ruïner et demolir le tressaint monument de IESVS CHRIST. Toutesuoyes depuis il se modera, et refrena, pour lhonneur et contemplation du Roy, par les prieres et exhortations du Consul de la nation Françoise, nommé Phe |